Аблздароўе: Віцебская БСМП атрымала 15 апаратаў ШВЛ
На новае абсталяванне патрацілі каля Br620 тыс. "Віцебскі аблвыканкам і Міністэрства аховы здароўя надаюць увагу ўмацаванню матэрыяльнай базы бальніц. Віцебская БСМП - асноўная ўстанова па каардынацыі як паступлення пацыентаў, так і размеркавання цяжкіх хворых. У бальніцы сканцэнтравана адна з самых вялікіх рэанімацый. У сувязі з гэтым аблвыканкам закупіў новае абсталяванне і вось менш чым праз тры тыдні апараты ШВЛ пачнуць працаваць", - адзначыў начальнік галоўнага ўпраўлення па ахове здароўя аблвыканкама Міхаіл Вішневецкі. Ён таксама распавёў, што ў бліжэйшыя тыдні завершыцца мадэрнізацыя сістэмы забеспячэння кіслародам тэрапеўтычнага корпуса Віцебскай БСМП, якая стане больш аўтаматызаванай. Устаноўленыя новыя чатыры ёмістасці дазволяць мінімізаваць чалавечы фактар у іх функцыянаванні.
Цяпер у медыцынскіх установах Віцебскай вобласці ўстаноўлена 2367 кіслародных кропак і 259 апаратаў ШВЛ.
Сёння Віцебская БСМП працуе толькі з ковіднымі пацыентамі, медыкі працуюць з вялікай нагрузкай. "Тэхніка выходзіць з ладу, часта даводзіцца рамантаваць, а яна, як і мы, працуе 24/7. У нас разгорнута рэанімацыя на 42 ложкі, таму вельмі важна мець такія апараты ШВЛ, якія дазволяць пашырыць і павысіць надзейнасць парку рэанімацыйнага абсталявання. Таксама нядаўна аблвыканкам выдзеліў дадатковыя сродкі, мы набылі 36 канцэнтратараў кіслароду", - адзначыў галоўны ўрач бальніцы Андрэй Захараў.
Начальнік аблздрава таксама ахарактарызаваў эпідэміялагічную сітуацыю ў вобласці. Па словах Міхаіла Вішневецкага, сітуацыя паляпшаецца, захворванне на каранавірус і шпіталізацыя зніжаецца. "З'яўляецца магчымасць перапрафіляваць установы на працу па сваім прызначэнні. Ужо тыдзень функцыянуе другі хірургічны корпус абласнога анкодыспансера, сёння Віцебская гарадская клінічная бальніца №1 вярнулася да свайго звычайнага рэжыму, да канца тыдня будзе выведзены з ковіднага профілю Віцебскі абласны клінічны спецыялізаваны цэнтр", - сказаў ён.-0-
