Качанава: у любой кропцы краіны людзі павінны мець магчымасць жыць, працаваць, вучыцца

Наталля Качанава нагадала, што тэматыкай папярэдняга пасяджэння Савета па ўзаемадзеянні органаў мясцовага самакіравання стала замацаванне маладых спецыялістаў у сельскай мясцовасці. Сёння - будаўніцтва жылых дамоў і інфраструктуры ў населеных пунктах з колькасцю 20 тыс. чалавек і менш. "Гэта вельмі актуальнае пытанне. Шостым Усебеларускім народным сходам вызначаны наш асноўны напрамак - моцныя рэгіёны. І Прэзідэнт заўсёды гаворыць, што наша краіна павінна развівацца раўнамерна, у любой кропцы нашай краіны людзі павінны мець усе магчымасці для таго, каб жыць, працаваць, вучыцца, - адзначыла спікер. - У нашай краіне дзейнічае праграма "Адзін раён - адзін праект". Сёння 208 такіх праектаў рэалізуецца".

Пытанні будаўніцтва жылля - на пастаянным кантролі. "Гэта пытанне было разгледжана на нарадзе ў Прэзідэнта. Кіраўнік дзяржавы даў дакладныя даручэнні сістэматызаваць усе заканадаўчыя акты, указы па дзяржпадтрымцы, якая сёння аказваецца людзям пры будаўніцтве жылля, - падкрэсліла старшыня Савета Рэспублікі. - Сёння на пасяджэнні прысутнічалі старшыні раённых і гарадскіх Саветаў дэпутатаў, сельскіх Саветаў, рай- і гарвыканкамаў Віцебскай вобласці. Мы на прыкладзе Глыбокага, у якім пражывае 18 тыс. чалавек, разгледзелі гэтыя пытанні, што яшчэ трэба зрабіць для таго, каб маладыя людзі і тыя людзі, якія прынялі рашэнне прыехаць, жыць і працаваць у такіх населеных пунктах, гарадах з невялікай колькасцю насельніцтва, маглі спакойна набываць жыллё. Гэта датычылася як індывідуальнага жылля, так і будаўніцтва шматкватэрнага жылля".

"Трэба ўлічваць, што ў нашай краіне са 115 гарадоў больш за 70 працэнтаў - гарады менавіта з такой колькасцю насельніцтва. Таму, вядома, нам трэба сур'ёзна падысці да вырашэння такога пытання. Больш таго, гэта пытанне будзе разгледжана ў бліжэйшыя дні на пасяджэнні Прэзідыума Савета Міністраў, дзе тыя падыходы, якія мы абмяркоўвалі сёння, будуць унесены намі ў тым ліку, таму што аб гэтым гаварылі нашы калегі, якія працуюць тут на месцах", - дапоўніла Наталля Качанава.-0-

"БелТА"