Пракуратура Віцебскай вобласці прааналізавала эфектыўнасць прынятых мер па забеспячэнні бяспечнага адпачынку непаўналетніх у летні перыяд
Даведка: у адпаведнасці з рашэннем Віцебскага аблвыканкама прадугледжаны шэраг арганізацыйна-практычных мерапрыемстваў у мэтах якаснай арганізацыі адпачынку, аздараўлення і занятасці дзяцей у летні перыяд часу, у тым ліку па падрыхтоўцы аздараўленчых лагераў. На месцах таксама прыняты адпаведныя рашэнні. У летні перыяд 2021 года планавалася аздаравіць 39 410 дзяцей.
Пракурорамі вывучаны пашпарты гатоўнасці аздараўленчых лагераў, праведзена іх выбарачнае наведванне. Да правядзення рэйдавых мерапрыемстваў прыцягваліся спецыялісты тэрытарыяльных органаў санітарна-эпідэміялагічнага, пажарнага наглядаў.
Не ўсе парушэнні санітарна-гігіенічных, пажарных патрабаванняў, патрабаванняў бяспекі, якія мелі месца на момант прыёмкі, былі ўстаранены ў тэрміны, вызначаныя ў рэкамендацыях адпаведных службаў (аздараўленчыя лагеры на базе ДУА «Бігасаўская сярэдняя школа Верхнядзвінскага раёна», СУСУ «Верхнядзвінская ДЮСШ», спартыўна-аздараўленчы лагер «Ніва» Талачынскага раёна).
Выяўлены парушэнні пры арганізацыі харчавання і захоўвання харчовых прадуктаў, іншыя парушэнні патрабаванняў санітарна-гігіенічных норм і правілаў у аздараўленчых установах Гарадоцкага, Бешанковіцкага, Міёрскага раёнаў.
Падвергнулася крытыцы стан пажарнай бяспекі ў дзіцячых аздараўленчых лагерах.
Пракуроры прааналізавалі стан бяспекі на розных відах атракцыёнаў (надзіманых, механічных, водных, стацыянарных) з пастаянным наведваннем дзяцей. Выяўлены шэраг парушэнняў норм і правілаў тэхнічнай бяспекі пры эксплуатацыі гульнявога надзіманага абсталявання (Віцебскі і іншыя раёны).
Традыцыйна праблемным застаецца пытанне забеспячэння бяспекі дзяцей на гульнявых пляцоўках населеных пунктаў.
Факты неналежнага ўтрымання дзіцячых гульнявых пляцовак, іх санітарнага і тэхнічнага стану ўстаноўлены ў г.Віцебску, Докшыцкім, Лепельскім, Лёзненскім, Талачынскім, Чашніцкім раёнах.
У бягучым годзе ў
Віцебскай вобласці дапушчаны рост гібелі дзяцей ад знешніх прычын.
Даведка: у цяперашні час у выніку смяротнага траўміравання загінула 13 дзяцей (аналагічны перыяд 2020 г. – 7), у тым ліку ў выніку ўтапленняў загінула 6 (2) дзяцей, дарожна-транспартных здарэнняў – 4 (0), суіцыду – 1 (1), механічнага самапашкоджання інструментам – 1 (0), гвалтоўных дзеянняў – 1 (1).
У мэтах удасканалення работы па папярэджанні гібелі дзяцей яшчэ ў 2015 годзе пратаколам міжведамаснага пасяджэння пракуратуры Віцебскай вобласці і Віцебскага аблвыканкама старшыням выканкамаў даручалася сфарміраваць пашпарты рэгіёнаў аб патэнцыйна небяспечных для дзяцей аб'ектах, вызначыць асоб, адказных за забеспячэнне бяспекі на такіх аб'ектах.
Як паказалі праверкі, у шэрагу рэгіёнаў вобласці мясцовыя выканаўчыя і распарадчыя органы не прымаюць вычарпальных мер па забеспячэнні бяспекі дзяцей.
Праінспектавана 147 патэнцыйна небяспечных аб'ектаў, з якіх 82 на вадзе. Па выяўленых парушэннях заканадаўства пракуроры рэгіёнаў унеслі 2 прадстаўленні, вынеслі 12 прадпісанняў.
Усяго пракурорамі раёнаў у бягучы летні перыяд у сувязі з выяўленымі парушэннямі заканадаўства аб бяспецы жыцця і здароўя дзяцей унесена 15 прадстаўленняў, вынесена 24 прадпісанні, 2 службовыя асобы прыцягнуты да адміністрацыйнай адказнасці, у органы мясцовай улады накіравана 3 інфармацыйныя запіскі.
Пракуратурай Віцебскай вобласці накіравана ў абласны выканаўчы камітэт інфармацыйная запіска, у якой прапанаваны канкрэтныя мерапрыемствы па навядзенні належнага парадку ў сферы бяспекі жыцця і здароўя дзяцей.
Вынікі разгляду знаходзяцца на кантролі пракуратуры.
Памочнік пракурора Віцебскай вобласці
Ірына Тарасевіч