Рэпертуар дакладна пад надвор'е: залатыя хіты на "Славянскім базары" гучалі да світання

Шесцітысячная зала Летняга амфітэатра сабрала адзін з самых любімых і чаканых гледачамі праектаў «Славянскага базару ў Віцебску» - «Залаты хіт».

--Будзем запальваць, пражываць лепшыя хвіліны нашага жыцця, калі за кадрам гучалі тыя самыя песні, якія сёння нас будуць вяртаць у нашу маладосць, нашу любоў. Мы з вамі ўсю ноч будзем маладзець і да раніцы станем зусім юнымі, - прывітала публіку вядучая канцэрта Ілона Браневіцкая.

Шоу стартавала з сюрпрызу для публікі - адкрыла канцэрт-дыскатэку «Залаты хіт» сваімі шлягерамі Народная артыстка Расіі Ларыса Даліна. Яе знакамітая «Пагода в доме» гучала як ніколі дарэчы, - канцэрт суправаджалі лівень і навальніцы. Зрэшты, пра дождж згадалі ў сваіх песнях і іншыя артысты.

-- Наконт надвор'я. Мы яго такое прывезлі, таму што калі спяваем песню «Кустурыца» пра тое, што там «мокрая курыца бегае басанож», заўсёды ідзе дождж, прычым казачны. Таму, ужо прабачце, ніяк без гэтага чараўніцтва не абышлося. Мне спадабалася выступаць для гэтай публікі, яна ўдзячная, запальваючая, нам удалося яе крыху ўзбадзёрыць, - падзяліўся Косця Грым.

На галоўнай пляцоўцы форуму мастацтваў сабраліся самыя яркія прадстаўнікі танцавальнай сцэны ад 80-х да 2000-х гг.: ансамбль «Лейся, песня», гурты «JOY», «Божья коровка», «Рок-острова», «Дискомафия», «Земляне», «Лицей», «Братья Грим», «Чистый голос», «BYCITY», Марат Чанышев, Алена Шаўчэнка і гурт «Метрополь», Антонела Буччы і іншыя.

Віцебскія весці