Селектарная нарада па пытаннях навядзення парадку на сельскагаспадарчых аб'ектах і арганізацыі веснавых палявых работ
На нараду былі запрошаны кіраўнікі ўсіх праваахоўных і кантралюючых органаў рэгіянальнага ўзроўню, каб з улікам вынікаў праведзеных імі праверак выпрацаваць выразны алгарытм навядзення парадку на кожным сельгасаб'екце і падтрымання яго ў пастаянным рэжыме ў далейшым. Як адзначыў старшыня аблвыканкама Мікалай Шарснёў, сілавыя структуры былі падключаны да гэтай работы з прычыны выключнасці сітуацыі, бо на месцах многія кіраўнікі і спецыялісты як сельгаспрадпрыемстваў, так і раённага звяна не выконваюць тое, што ім належыць рабіць штодзённа, як гэта прадпісана тэхналагічнымі рэгламентамі. Была заслухана інфармацыя кіраўнікоў Камітэта дзяржаўнага кантролю, УУС і пракуратуры вобласці, абласных упраўленняў МНС і Дзяржаўтаінспекцыі. У канцы сакавіка іх супрацоўнікі правялі маніторынгі стану спраў на месцах і праінфармавалі аблвыканкам аб іх выніках, зрабіўшы выснову аб адсутнасці сістэмы работы на месцах і кантролю з боку спецыялістаў. Гэта і запатрабавала неадкладных мер рэагавання.
Напрыклад, узору спецыялістаў Камітэта дзяржкантролю вобласці ў 27 правераных гаспадарках 16 раёнаў паўсталі не гатовая да пасяўной тэхніка і надзвычай нізкая забяспечанасць мінеральнымі ўгнаеннямі, нават арганікі на палі вывезлі толькі каля 80 працэнтаў ад запланаванага. Пры гэтым у шэрагу выпадкаў па справаздачах раёнаў сітуацыя па гатоўнасці трактароў больш спрыяльная. На 40 фермах 17 сельгаспрадпрыемстваў выяўлены грубыя парушэнні тэхналогіі ўтрымання жывёлы: гной выдаляўся несвоечасова, не хапала падсцілкі, фермы не агароджаны. А ў ДП «Дразды-Агра» ўстаноўлены факт прычынення вялікай матэрыяльнай шкоды дзяржаве ў памеры 100 тысяч рублёў тым, што пабудаваная два гады таму даільная зала не ўведзена ў эксплуатацыю, аб'ект не быў закансерваваны, доступ на яго не абмежаваны, камп'ютарная сістэма выйшла з ладу. Па словах пракурора вобласці Вадзіма Сушчынскага, узбуджана крымінальная справа, устанаўліваецца кола службовых асоб, вінаватых у нанясенні дзяржаве ўрону, бо даільная зала будавалася з дзяржпадтрымкай. Усяго дзяржкантроль выявіў у сельгаспрадпрыемствах 84 факты парушэнняў і недахопаў, ужо прыцягнуты да адміністрацыйнай адказнасці 34 чалавекі, хоць пакаранне на першым этапе не было галоўнай мерай уздзеяння. Кіраўнікам выдадзены рэкамендацыі па іх ліквідацыі і недапушчэнні ў далейшым. Па некаторых фактах ужо атрымана інфармацыя аб ліквідацыі парушэнняў. Але далей, як адзначыў старшыня КДК Віцебскай вобласці Вадзім Зараўкін, ніякіх папярэджанняў ужо не будзе, толькі жорсткае пакаранне. На нарадзе адзначалася, што такая сітуацыя стала магчымай і з-за адсутнасці сістэмнага кантролю за сваімі сферамі і з боку зямельнай службы, ветнагляду, экалогіі, у якіх хапае паўнамоцтваў, каб не проста выяўляць недахопы і рапартаваць наверх аб колькасці праведзеных праверак, але і дамагацца іх эфектыўнага ліквідацыі.
Сур'ёзнай праблемай на старце пасяўной стала негатоўнасць значнай часткі тэхнікі да выхаду ў поле. Паводле інфармацыі Дзяржаўтаінспекцыі вобласці, толькі 48 працэнтаў наяўных у гаспадарках трактароў прайшлі тэхагляд, з іх энергонасычаных – яшчэ менш, 34 працэнты. Тэхніка няспраўная, зношаная гума, а частка яе, нават знаходзячыся ў працоўным стане, не можа прайсці тэхагляд з-за запазычанасці па плацяжах лізінгадаўцам, што ў сваю чаргу не дазваляе яе зарэгістраваць за сельгаспрадпрыемствамі. Маса праблем і з правядзеннем перадрэйсавых аглядаў кіроўцаў, ёсць факты фармальнага прастаўлення адзнак аб гэтай працэдуры. Вынік – складзена 19 пратаколаў за знаходжанне за рулём у стане алкагольнага ап'янення. Супрацоўнікі органаў унутраных спраў вобласці выявілі факты разукамплектавання тэхнікі, адсутнасці вартаўнічай аховы на мехдварах і належных мер па зберажэнні таварна-матэрыяльных каштоўнасцей. Часта ствараюць умовы для парушэнняў падначаленымі, дрэнны прыклад паказваюць самі кіраўнікі. Напрыклад, перад домам галоўнага інжынера сельгаспрадпрыемства «Арэхоўна» Ушацкага раёна знаходзіліся два разукамплектаваныя трактары. Скрыванне падкорму жывёлы ў Браслаўскім раёне, недаставернасць уліку пагалоўя, неўлічаныя будынкі і збудаванні, скажэнне дзяржаўнай статыстычнай справаздачнасці і многія іншыя выяўленыя непарадкі, прычым не адзінкавага характару, запатрабавалі жорсткіх высноў у адрас кадраў сельгаспрадпрыемстваў і раённага звяна, уключаючы старшынь райвыканкамаў, зробленых кіраўніком вобласці.
-- Гэта крайняя мера -- перакладанне функцыі кантролю з-за недапрацовак кадраў на месцах на сілавыя структуры, -- сказаў Мікалай Шэрстнёў. -- Але калі вы не разумееце, што кожны дзень трэба тэхналагічна выконваць сваю працу, навесці парадак там, дзе яго няма, і пастаянна падтрымліваць, давядзецца пакуль дзейнічаць такімі метадамі. Ціск зверху будзе толькі ўзмацняцца, пакуль сітуацыя не нармалізуецца. Неабходна закрыць тыя дзядоўскія маленькія фермы, дзе нельга забяспечыць тэхналогію ўтрымання, і перавесці жывёлу ў нармальныя памяшканні. На мехдварах трэба разабраць спісаную тэхніку і прыхаваць прыдатныя вузлы, а астатняе здаць на металалом. І так на кожным участку вытворчасці. У наступную суботу размову будзем будаваць інакш, спытаўшы ў кожнага старшыні райвыканкама, якая праца зроблена, ці створана сістэма падтрымання наведзенага парадку. Адлік часу пайшоў.