Скрозь часы і пакаленні

Гісторыя транспартнай пракуратуры ў Рэспубліцы Беларусь сваімі каранямі сыходзіць глыбока ў стагоддзі. У сучасным выглядзе яна сфарміравалася ў 1976 г. на падставе загаду Генеральнага пракурора СССР №480-л

«Аб арганізацыі транспартных пракуратур». Загадам Генеральнага пракурора СССР №46 ад 05.11.1980 утворана Беларуская транспартная пракуратура. У цяперашні час дзейнасць транспартных пракуратур рэгламентавана загадам Генеральнага пракурора Рэспублікі Беларусь ад 03.09.2021 №25 «Аб арганізацыі пракурорскага нагляду за выкананнем заканадаўства на транспарце і ў мытных органах».

Шмат выдатных людзей, прафесіяналаў сваёй справы служыла
ў транспартнай пракуратуры за гэты час. З адным з іх – Анатолем Мікалаевічам Сеўруковым, праведзена сустрэча калектывам Віцебскай транспартнай пракуратуры.

Анатоль Мікалаевіч, без перабольшання, асоба гістарычная. Свой кар'ерны шлях ён пачаў у далёкім 1977 г. на пасадзе следчага Віцебскай транспартнай пракуратуры, затым праходзіў службу на пасадзе памочніка Віцебскага транспартнага пракурора, некаторы час служыў у пракуратуры Віцебскай вобласці. Кіраўніцтва па вартасці ацаніла маральна-дзелавыя якасці Анатоля Мікалаевіча і ў 1985 г. ён прызначаны пракурорам Пастаўскага раёна.
Праслужыўшы на названай пасадзе больш за дзесяць гадоў, у 1997 г. прызначаны на пасаду пракурора Глыбоцкага раёна, з якой
ў 2012 г. з пашанай сышоў на заслужаны адпачынак. Усяго за службовую дзейнасць Анатоля Мікалаевіча змянілася 11 Генеральных пракурораў і 6 пракурораў Віцебскай вобласці. За час службы
ў Пастаўскім і Глыбоцкім раёнах Анатолю Мікалаевічу неаднаразова прапаноўвалі вышэйшыя пасады, аднак гэта яго не прываблівала, не цягнула яго ў вялікі горад, душа ляжала да працы «на зямлі»…

У цёплай, сяброўскай абстаноўцы прайшла гэтая сустрэча. Анатоль Мікалаевіч распавёў аб асаблівасцях службы ў пракуратуры БССР, успомніў працяглыя камандзіроўкі і раскрытыя яго намаганнямі крымінальныя справы, адзначыў важнасць працы органаў пракуратуры
і ўзгодненасць пракурорскага калектыву.

Віцебскі транспартны пракурор Канстанцін Шыенок пажадаў Анатолю Мікалаевічу моцнага здароўя і доўгіх гадоў жыцця, а таксама адзначыў: «Такія сустрэчы надзвычай важныя, паколькі дазваляюць не толькі задаць ветэранам з багацейшым жыццёвым
і службовым вопытам цікавыя пытанні, але і аб'ядноўваюць пракурорскіх работнікаў праз часы і пакаленні».