Праз час і кіламетры. Найлепшых супрацоўнікаў ДАІ рэгіёну ўшаноўваюць у Віцебску

Сотні чалавек сабрала ўрачыстае мерапрыемства з нагоды 90-годдзя Дзяржаўтаінспекцыі ў Канцэртнай зале «Віцебск». Тут — прадстаўнікі ўлады рэгіёна і горада, кіраўнікі сілавых структур, прадпрыемстваў і арганізацый, а таксама ветэраны, супрацоўнікі ДАІ.

З прафесійным святам павіншаваць тых, хто на варце парадку на дарогах, прыйшлі ганаровыя госці: старшыня аблвыканкама Аляксандр Рагожнік, памочнік Прэзідэнта — інспектар па Віцебскай вобласці Уладзімір Юргевіч, кіраўнік дэпутацкага корпуса рэгіёна Дзмітрый Дзямідаў, старшыня Віцебскага гарвыканкама Аляксей Героеў.

– Дзяржаўтаінспекцыяй пройдзены вялікі этап у найноўшай гісторыі Беларусі. Прыемна глядзець на сённяшняе аснашчэнне – гэта ўжо далёка не тое, што было ў 1990-х гадах, пачыналі з ВАЗ-2101, а цяпер – аўтамабілі Geely беларускай вытворчасці. У шэрагах супрацоўнікаў з'явілася шмат моладзі, якой цікавая гэтая праца. За бяспекай на дарозе стаяць чалавечыя жыцці, чыесьці бацькі, маці, дзеці. І гэта вельмі важна, таму што даражэй за чалавечае жыццё нічога няма. Ваша праца выклікае вялікую павагу, бо працаваць даводзіцца і ў святы. Вы застаецеся на сваіх працоўных месцах, каб усё астатняе насельніцтва адчувала сябе камфортна і бяспечна. Шчыра, ад усяго сэрца жадаю дабрабыту вашым сем'ям, каб у іх панавалі цяпло і соладзь, — адзначыў старшыня аблвыканкама Аляксандр Рагожнік.

Кіраўнік паўночнага рэгіёну адрасаваў словы падзякі ветэранам і дзейным супрацоўнікам Дзяржаўтаінспекцыі вобласці за самаадданую службу.
– Для Дзяржаўтаінспекцыі 90 гадоў – гэта толькі мяжа, якую мы перасягнулі. Працягваем ісці наперад, развівацца, дасягаць пэўных вынікаў у забеспячэнні бяспекі дарожнага руху на дарогах Віцебскай вобласці, – падкрэсліў начальнік УДАІ УУС Віцебскага аблвыканкама палкоўнік міліцыі Міхаіл Дзядзічкін. – Мы святкуем юбілей Дзяржаўтаінспекцыі. Гэта свята супрацоўнікаў, ветэранаў, і, напэўна, усіх грамадзян, бо ўдзельнікам дарожнага руху з'яўляецца кожны чалавек.

Старшыня Віцебскага гарвыканкама Аляксей Героеў адзначыў зладжаную цесную працу органаў мясцовай улады, гарвыканкама з Дзяржаўтаінспекцыяй. Рэалізуецца мноства праграм па забеспячэнні дарожнай бяспекі, якія ініцыююць супрацоўнікі ДАІ – прафесіяналы сваёй справы, людзі з высокай матывацыяй. Менавіта дзякуючы службе такіх людзей Дзяржаўтаінспекцыя змагла не проста захаваць, але і прымножыць усе каштоўнасці, спадчыну, сфарміраваную яшчэ ў савецкія часы. Аляксей Героеў асобна спыніўся на прафілактычнай рабоце падраздзяленняў.

– Сёння Дзяржаўтаінспекцыя, акрамя асноўных напрамкаў дзейнасці, займаецца асветніцкай дзейнасцю сярод непаўналетніх у частцы вывучэння ПДР. Праводзяцца разнастайныя прэс-канферэнцыі, круглыя сталы і сустрэчы, у тым ліку сумесна з установамі адукацыі. Усё гэта робіцца для таго, каб жыхары горада, вобласці знаходзіліся ў бяспецы, – сказаў Аляксей Героеў.

Не абышлося без падарункаў. Старшыня гарвыканкама перадаў Міхаілу Дзядзічкіну абраз з выявай святой роўнаапостальнай вялікай княгіні Вольгі, каб яна стала ахоўніцай супрацоўнікаў Дзяржаўтаінспекцыі, а таксама ўсіх удзельнікаў дарожнага руху горада і рэгіёна.

Шматлікія ўзнагароды прызначаліся ветэранам органаў унутраных спраў, якія прысвяцілі жыццё службе ў ДАІ.

– Ведамства за гады існавання атрымала вялікае развіццё. Я прыйшоў на службу ў 65-годдзе яе ўтварэння. Тады мы такіх рэсурсаў не мелі, у распараджэнні аддзялення ў раёне было ўсяго пару адзінак транспарту, былі арганізаваны пешыя патрулі. Сёння прыемна глядзець, як рады Дзяржаўтаінспекцыі папаўняюць маладыя хлопцы і адразу прыступаюць да нясення службы на новым транспартным сродку. Адладжаны ўсе этапы: не трэба асобна думаць аб рамонце, аб тым, як выехаць на змену, а гэта шмат пра што кажа, – падзяліўся ветэран органаў унутраных спраў, маёр міліцыі ў запасе Аляксандр Капусцін, які сыходзіў на заслужаны адпачынак з пасады начальніка аддзялення ДАІ ў Міёрах.

Меладычным завяршэннем урачыстага мерапрыемства стаў святочны канцэрт, у асноўным падрыхтаваны супрацоўнікамі ДАІ рэгіёна, якія займаюцца мастацкай самадзейнасцю.

WEB"Віцебскія весці"