Полацк рыхтуецца да дня беларускага пісьменства (17.05.2017)

Больш за 200 аб'ектаў абнаўляюць у Полацку да Дня беларускага пісьменства, які пройдзе тут 3 верасня. Гатоўнасць старажытнага горада да святкавання напярэдадні ацанілі члены нацыянальнага аргкамітэта на чале з намеснікам прэм'ер-міністра Беларусі Васілём Жарко. Яны наведалі Мастацкую галерэю, Полацкі дзяржуніверсітэт і Музей беларускага кнігадрукавання. Абмеркавалі ключавыя моманты падрыхтоўкі да маштабнага свята, праграма якога яшчэ ў стадыі распрацоўкі. Месцам правядзення Дня беларускага пісьменства родны горад першадрукара Францыска Скарыны становіцца ў трэці раз. Сёлета гэта асабліва сімвалічна: у Полацку адзначаць 500-годдзе беларускага кнігадрукавання, а сам горад адсвяткуе 1155-ы дзень нараджэння.