Свята харавога мастацтва прайшло 2 чэрвеня ў рамках Міжнароднай харавой асамблеі «Да вытокаў Русі». Акрамя конкурсных выступленняў удзельнікаў, яркім момантам канцэрта стала прэм’ера Урачыстай кантаты рускага кампазітара беларуска-польскага паходжання Восіпа Казлоўскага Te Deum laudamus («Цябе, Бога, хвалім», 1814 — 1815), напісанай у гонар перамогі ў вайне з Напалеонам (упершыню прагучала падчас каранацыі Мікалая I у 1826 годзе).

Велічнае двуххарнае творы ў суправаджэнні аргана выканалі Арэнбургскі камерны хор, Віцебскі народны маладзёжны хор і вакальная група хору «Глорыя» з Санкт-Пецярбурга (мастацкі кіраўнік Таццяна Антонава). Партыя аргана – Нэля Баравік з Полацка, салісты з Арэнбурга – сапрана Кацярына Швыркава, тэнар Андрэй Цімафееў. Дырыжор — мастацкі кіраўнік Арэнбургскага камернага хору, заслужаны дзеяч мастацтваў Расіі, прафесар Вольга Серабрайская.

Конкурсную праграму на суд журы, у склад якога ўвайшлі выдатныя дзеячы харавога мастацтва Беларусі і Расіі, прадставілі ўзорны хор «Фэст» СШ №20 Мінска; жаночы хор «Жар-Сокал» (Масква); камерны хор «Партес» (Обнінск Калужскай вобласці, Расія); Уральскі аматарскі хор (Екацярынбург, Расія); хор кітайскіх студэнтаў ВДУ імя П. Машэрава.

Таксама ўсе ўдзельнікі асамблеі «Да вытокаў Русі» праспявалі «Гімн Ефрасінні», аўтар музыкі – мастацкі кіраўнік маладзёжнага хору Аляксандр Рауза (словы манашкі Ефрасінні Рудэнка). Дырыжор — член журы, віцебскі кампазітар Віталь Рауза.

– Мы ўдзячныя арганізатарам фестывалю за магчымасць дакрануцца да вяршынь харавога мастацтва і выступіць у цудоўнай зале Сафійскага сабора з унікальнай акустыкай. Сумеснае выкананне такой манументальнай музыкі з прафесійным калектывам – гэта каштоўны досвед, які дапамагае нам расці ў творчым плане і натхняе на новыя праекты, – адзначыла хармайстар Віцебскага моладзевага хору Інна Уласава.

ДАВЕДКА «ВВ»

Восіп Казлоўскі (1757 – 1831) нарадзіўся на Магілёўшчыне, якая ўваходзіла тады ў склад Рэчы Паспалітай, а затым – Расійскай імперыі. На яго рахунку оперы, інструментальныя, харавыя і сімфанічныя творы. Аўтар першага неафіцыйнага гімна Расіі «Гром победы, раздавайся!» на словы Гаўрылы Державина. Быў хатнім настаўнікам музыкі ў будучага знакамітага кампазітара Міхаіла Клеафаса Агінскага.

WEB"Віцебскія весці"