«У школу – з «Белай Руссю»: выхаванцам Віцебскага дзіцячага садка ўручылі спартыўны інвентар і правялі майстар-клас па баскетболе
Як адзначыў кіраўнік адміністрацыі Першамайскага раёна Яўген Семянёнычаў, сёлета РГА «Белая Русь» праводзіць традыцыйную акцыю не толькі для школьнікаў, але і выхаванцаў дзіцячых садкоў, якія ў наступным годзе стануць першакласнікамі.
– Мы хочам прышчапіць дзецям любоў да спорту і здаровага ладу жыцця з ранніх гадоў, таму дорым спартыўны інвентар, які дапаможа выхаванцам дзіцячага садка праявіць сябе ў футболе, гімнастыцы, баскетболе і іншых відах спорту, – сказаў Яўген Семянёнычаў.
У знак падзякі дашкольнікі прадставілі для гасцей канцэртную праграму. Дзеці чыталі вершы, танцавалі, адгадвалі загадкі, дэманстравалі сваю спартыўную падрыхтоўку. А яшчэ актыўна задавалі пытанні чэмпіёну Еўропы сярод моладзевых каманд 1994 года, лепшаму баскетбалісту Беларусі (1994, 1996 і 1997 гг.), галоўнаму трэнеру баскетбольнага клуба «Рубон» Руслану Бойдакаву. Ён у сваю чаргу разам з выхаванцамі баскетбольнай школы «Аквілон», моладзевай і асноўнай каманд «Рубон» правёў для дзяцей майстар-клас па вядзенні баскетбольнага мяча і кідках у кошык.
– Мы не маглі застацца ўбаку і з задавальненнем далучыліся да акцыі, каб папулярызаваць спорт, фізкультуру. Ініцыятыву падтрымалі дасведчаныя гульцы нашай каманды, маладыя зорачкі і трэнеры, – распавёў Руслан Бойдакаў. – Спорт для моцных і дужых хлопчыкаў і дзяўчынак, якія жадаюць дасягнуць вынікаў, а таксама ведаюць, што такое дысцыпліна. Каб яе развіць, неабходна наведваць спартыўныя секцыі, што асабліва актуальна пасля адпачынку на летніх канікулах.
Дарэчы, у Віцебскай баскетбольнай школе навучаюцца каля 100 дзяцей, а займацца можна з 4 гадоў.