У Віцебскім аблвыканкаме абмеркавалі гатоўнасць службаў да вясновай паводкі
Ваблвыканкаме абмеркавалі гатоўнасць службаў да рэагавання на магчымыя негатыўныя наступствы вясновай паводкі. Як нагадаў начальнік абласнога ўпраўлення МНС Сяргей Меляшкін, падзеі 2023 года дазволілі вызначыць найбольш уразлівыя ўчасткі і выбудаваць сістэмную працу па папярэджанні надзвычайных сітуацый.
Менавіта паводка 2023 года ўказала на месцы, якія знаходзяцца ў зоне рызыкі. Сёння гэтыя тэрыторыі на асаблівым кантролі ратавальнікаў, насельніцтва загадзя інфармуецца аб абстаноўцы, якая складваецца, і магчымых наступствах воднай стыхіі.
З улікам значнай колькасці выпаўшага снегу назіраецца павышэнне ўзроўню вады ў Заходняй Дзвіне. Чакаецца пад'ём вады да крытэрыяў небяспечна высокага значэння, пры якім магчыма падтапленне населеных пунктаў у Гарадоцкім, Верхнядзвінскім, Мёрскім і Полацкім раёнах. Вядзецца кругласутачны маніторынг гідралагічнай сітуацыі, ужо паступаюць звароты грамадзян аб падтапленні прыдамавых тэрыторый і падвалаў.
– У рамках даручэння кіраўніка вобласці арганізаваны і праведзены праверкі гатоўнасці ў Гарадоцкім і Верхнядзвінскім раёнах. Міністэрства па надзвычайных сітуацыях гатова да выканання пастаўленых задач падчас магчымай паводкі, – адзначыў Сяргей Меляшкін.
У рэгіёне рэалізуецца комплекс мер бяспекі. Вызначаны пералік жылых дамоў і ўчасткаў дарог, якія трапляюць у зоны магчымых падтапленняў, праводзіцца іх пастаянны маніторынг. Выяўлены 16 заторна-зажорных участкаў рэк, дзе пры неабходнасці могуць быць праведзены выбуховыя работы па ачыстцы акваторыі ад лёду. У 12 паводканебяспечных раёнах запланаваны тактыка-спецыяльныя вучэнні.
Жыллёва-камунальныя службы ачышчаюць дажджапрыёмнікі і водаадводныя сістэмы ад снегу і лёду, прамываюць вадаправодныя трубы.
На тэрыторыі вобласці створаны два зводныя атрады, аснашчаныя інжынернай тэхнікай, плаўсродкамі і неабходным абсталяваннем.
Ратавальнікі нагадваюць: у выпадку ўзнікнення верагоднасці затаплення неабходна паспрабаваць падняць вышэй мэблю і бытавыя прыборы, падумаць аб пражыцці і запасе лекавых сродкаў у выпадку адмовы ад эвакуацыі.
Вясновая паводка пад кантролем – службы рэгіёну гатовыя да любога сцэнару.