Віцебск дыхае свабодна! Далучайся да Дня без аўтамабіля і маштабнага велапрабегу
Віцебск рыхтуецца да актыўнага ўдзелу ў міжнароднай акцыі «Дзень без аўтамабіля», якая пройдзе 22 верасня. Абласны камітэт прыродных рэсурсаў і аховы навакольнага асяроддзя заклікае жыхароў і гасцей паўночнага рэгіёну адмовіцца ад асабістага аўтатранспарту і скарыстацца альтэрнатыўнымі спосабамі перамяшчэння - роварамі, самакатамі, грамадскім транспартам ці проста прагуляцца пешшу.
- Ад кожнага з нас залежыць чысціня атмасфернага паветра! - падкрэсліваюць у ведамстве. - Далучайцеся да Дня без аўтамабіля і ўнясіце свой уклад у захаванне навакольнага асяроддзя.
Велакалона пачне свой рух у 14.00 па маршруце вул. 33-й Арміі – вул. Генерала Іваноўскага – прасп. Будаўнікоў – плошча Сцяга і Герба. У гэты час у парку 1000-годдзя Віцебска будуць працаваць інтэрактыўныя пляцоўкі падраздзяленняў МНС, ДАІ, АМАП, Аховы, выстава электратранспарту. У 16.00 адбудзецца падвядзенне вынікаў акцыі, узнагароджанне пераможцаў спаборніцтваў.
Чакаецца, што свой удзел у велапрабегу возьмуць першы намеснік Міністра прыродных рэсурсаў і аховы навакольнага асяроддзя Рэспублікі Беларусь Максім Лысенка, намеснік старшыні Віцебскага абласнога выканаўчага камітэта Дзмітрый Петруша, старшыня Віцебскага абласнога камітэта прыродных рэсурсаў і аховы навакольнага асяроддзя Раман Кольца, а таксама больш за 50 прадстаўнікоў прадпрыемстваў і арганізацый горада, школьнікі і грамадскасць.
Дарэчы, у межах тыдня мабільнасці ў Віцебскай вобласці разгорнута маштабная інфармацыйная кампанія. На аўтатранспартных прадпрыемствах, заправачных станцыях, у гандлёвых цэнтрах і іншых грамадскіх месцах распаўсюджваюцца улёткі і флаеры, якія прыцягваюць увагу да праблемы забруджвання атмасфернага паветра. Ва ўстановах адукацыі і працоўных калектывах праходзяць інфармацыйныя гадзіны і гутаркі, прысвечаныя экалагічным аўтамабілям і беражлівым стаўленню да навакольнага асяроддзя. Сярод школьнікаў і моладзевых арганізацый праводзяцца конкурсы сачыненняў і малюнкаў на тэму «Транспарт будучыні».