Намеснік старшыні аблвыканка Барыс Ефрэмаў звярнуў увагу на тэхналагічнае і якаснае правядзенне работ па барацьбе з боршчавіком Сасноўскага
Ацэньваючы сітуацыю ў рэгіёне, старшыня абласнога камітэта прыродных рэсурсаў і аховы навакольнага асяроддзя Віктар Галанаў адзначыў, што паступова паляпшаецца якасць вады ў большасці рэк і азёр, стаў чысцейшым паветра, паменшылася колькасць прамысловых аварый з цяжкімі экалагічнымі наступствамі. За апошнія тры гады на рэалізацыю прыродаахоўных мерапрыемстваў накіравана 3,1 млн руб.
Скарачаюцца выкіды
За справаздачны перыяд выкіды забруджвальных рэчываў у атмасфернае паветра ад стацыянарных і мабільных крыніц паменшыліся на 11,1 тыс. т – даведзены паказчык перавыкананы ў два разы. Скарачэнне выкідаў забяспечана за кошт павелічэння колькасці аўтатранспарту высокіх экалагічных класаў і правядзення на 212 вытворчых аб'ектах мерапрыемстваў па перааснашчэнні, удасканаленні і аптымізацыі тэхналагічных працэсаў.
Стан атмасфернага паветра ў Віцебску, Полацку і Наваполацку, дзе ўстаноўлены аўтаматычныя станцыі бесперапыннага вымярэння ўтрымання прыярытэтных забруджвальных рэчываў, у асноўным ацэньваецца як вельмі добрае, добрае і ўмеранае. Доля перыядаў з здавальняючай і дрэннай якасцю нязначная. У той жа час на аб'ектах прамысловага вузла Наваполацка неабходна завяршыць праводзімыя мерапрыемствы па зніжэнні забруджвання паветра дыяксідам серы. Таксама трэба працягнуць працу па мадэрнізацыі кацельняў ЖКГ, укараненні тэхналогій па уцягванні ў энергабаланс аднаўляльных крыніц энергіі і пашырэнні выкарыстання электратранспарту.
Увага – ачышчальным
Дзяржпраграма прадугледжвае паступовае скарачэнне скідвання недастаткова ачышчаных сцёкаў у паверхневыя водныя аб'екты. За апошнія чатыры гады аб'ёмы скараціліся са 123 тыс. куб. м да 20 тыс. куб. м. Выкананы рамонт і рэканструкцыя камунальных ачышчальных збудаванняў у Оршы, Докшыцах, Лепелі, Паставах, працягваюцца работы на падобных аб'ектах Віцебска і Браслава. Пабудаваны сеткі каналізацыі і новыя ачышчальныя збудаванні ў Верхнядзвінску і Глыбокім.
Аднак адной з вострых праблем з'яўляецца высокі знос ачышчальных збудаванняў жывёлагадоўчых комплексаў. За апошнія 2,5 года ўстаноўлена 11 фактаў забруджвання навакольнага асяроддзя сельскагаспадарчымі аб'ектамі.
Да магчымых крыніц забруджвання падземных вод адносяцца і 764 невыкарыстоўваемыя водазаборныя свідравіны. За апошнія тры гады ліквідацыйны тампанаж праведзены на 186 аб'ектах.
Небяспечныя пестыцыды
Асаблівая праблема – непрыдатныя пестыцыды, якія захоўваюцца на 20 складах у колькасці больш за 540 т і засталіся з савецкіх часоў. У бягучым годзе ў нашай краіне пачалася рэалізацыя праекта міжнароднай тэхнічнай дапамогі «Устойлівае кіраванне стойкімі арганічнымі забруджвальнікамі і хімічнымі рэчывамі» коштам 8 млн еўра. Ён прадугледжвае вываз непрыдатных пестыцыдаў за межы Беларусі для бяспечнага знішчэння. У аблвыканкаме праведзена рабочая нарада, вызначаны чатыры склады ў Полацкім, Талачынскім, Лёзненскім і Пастаўскім раёнах, якія стануць лагістычнымі цэнтрамі для кансалідацыі вывазу небяспечных рэчываў. У бліжэйшы час Мінпрыроды правядзе конкурс па выбары пастаўшчыка паслуг. Райвыканкамам у найкароткія тэрміны неабходна вызначыць балансатрымальнікаў непрыдатных пестыцыдаў і арганізаваць іх узаемадзеянне з выканаўцам работ.
Несупакойны баршчэўнік
Праведзеная летась інвентарызацыя выявіла больш за 4 тыс. месцаў росту баршчэўніка Сасноўскага на плошчы звыш 3,9 тыс. га. Сёлета на барацьбу з інвазіўнай раслінай з мясцовых бюджэтаў выдзелена больш за 1,2 млн руб. Па стане на 24 чэрвеня першасна апрацавана 90% плошчаў, у асноўным – хімічным метадам. У гэтым годзе ў гаспадарчы зварот плануецца ўцягнуць 160 га тэрыторыі, пашкоджанай раслінай.
Трывогу ў эколагаў выклікае і залатарнік канадскі, які выяўлены на 241 га. Найбольш інвазіўныя Аршанскі і Віцебскі раёны, а таксама абласны цэнтр.
Падводзячы вынікі, намеснік старшыні аблвыканкама Барыс Ефрэмаў, які праводзіў пасяджэнне, завастрыў увагу на тэхналагічным і якасным правядзенні работ па барацьбе з баршчэўнікам Сасноўскага. Таксама неабходна арганізавана падысці да рэалізацыі праекта па ўтылізацыі непрыдатных пестыцыдаў, каб ачысціць Віцебшчыну ад небяспечных рэчываў.
"Віцебскія весці", фота з адкрытых крыніц.