Пасяджэнне камісіі па НС пры аблвыканкаме: у Віцебскай вобласці плануюць адмовіцца ад выкарыстання аміяку на прадпрыемствах
У Віцебскай вобласці сёння працуюць 23 прадпрыемствы, якія выкарыстоўваюць у сваёй сістэме аміяк. У 2009 годзе іх было 39. "Плануем распрацаваць план дзеянняў, каб у далейшым адмовіцца ад выкарыстання аміяку ў сістэмах прадпрыемстваў", - адзначыў Уладзімір Белавус.
Як паведамлялася, у Міёрах 25 верасня на вытворчым участку Полацкага малочнага камбіната адбыўся выкід аміяку. Высветлілася, што ў выніку разгерметызацыі зварачнага шва халадзільнай устаноўкі на ўчастку ад выпарніка да вільгацеразмеркавальніка адбыўся выкід рэчыва. Персанал самастойна пакінуў тэрыторыю прадпрыемства. У радыусе 200 м ад месца здарэння размешчана ўстанова адукацыі. Ратавальнікамі з будынка школы ў бяспечнае месца эвакуіравана 560 дзяцей і 110 чалавек персаналу. Ніхто не пацярпеў.
У той дзень было выкінута 63 кг аміяку, расказалі ратавальнікі. Наступныя замеры паветра, глебы і вады паказалі, што перавышэння дапушчальнай канцэнтрацыі рэчыва не было. Спрыяла паспяховай ліквідацыі здарэння і надвор'е: 25 верасня быў слабы вецер, ён не разнёс рэчыва па наваколлі.
Падчас праверкі ў цэху знайшлі парушэнні. Не было дастатковай колькасці процігазаў, іншых спецсродкаў, адсутнічала неабходная дакументацыя, не праводзілася паверка некаторых прылад і іх планавае выпрабаванне.
"Прычынай інцыдэнту стала халатнасць службовых асоб, нежаданне своечасова абслугоўваць абсталяванне", - дадаў начальнік Віцебскага абласнога ўпраўлення МНС Сяргей Мелешкін.
Сёння ў аблвыканкаме прайшло пасяджэнне камісіі па надзвычайных сітуацыях. На ёй разгледзелі пытанне гатоўнасці дамоў і арганізацый Віцебскай вобласці да восеньска-зімовага перыяду.