Пасяджэнне аблвыканкама: у развіццё АПК Віцебскай вобласці маюць намер інвеставаць Br2,8 млрд
Па словах кіраўніка аблсельгасхарча, пры павышэнні эфектыўнасці працы аграрыяў стаўка робіцца на вытворчасць прадукцыі з высокай дабаўленай вартасцю. "Да 2025 года плануецца цалкам забяспечыць загрузку малочна- і збожжаперапрацоўчых прадпрыемстваў, мясаперапрацоўчых - на 70%", - адзначыў Сяргей Егораў.
Ён акцэнтаваў увагу на інвестыцыях, якія маюць намер рэалізаваць у 2020-2025 гадах у АПК. Грошы пойдуць на завяршэнне будаўніцтва ферм і комплексаў, узвядзенне новых аб'ектаў і набыццё сельгастэхнікі. Таксама фінансы выдаткуюць на ўзвядзенне жылля на вёсцы, навучанне спецыялістаў. Агульная сума інвестыцый складзе Br2 млрд 823 млн.
Намеснік старшыні аблвыканкама Барыс Ефрэмаў распавёў, што ў рэгіёне вызначаны пералік арганізацый, якія абслугоўваюць галіну, вырабляюць, перапрацоўваюць і прадаюць сельгаспрадукцыю. У спіс увайшлі 134 арганізацыі. "У вобласці створаны сем аграпрамысловых аб'яднанняў на базе перапрацоўчых прадпрыемстваў. Гэта Верхнядзвінскі масласырзавод, Віцебскі мясакамбінат, ААТ "Малако", Пастаўскі малочны завод, Глыбоцкі малочна-кансервавы, Аршанскі мясакансервавы і Полацкі малочныя камбінаты", - адзначыў Барыс Ефрэмаў.
Для ўсіх удзельнікаў аграаб'яднанняў у гэтым годзе вызначаны памер абавязковых адлічэнняў для пагашэння даўгоў.
Прэзідэнт Беларусі Аляксандр Лукашэнка 25 лютага падпісаў указ №70 "Аб развіцці аграпрамысловага комплексу Віцебскай вобласці". Дакумент змяшчае меры па паляпшэнні сітуацыі ў сельскай гаспадарцы паўночнага рэгіёну.