Прыёмная выканкама
210010, г. Віцебск, вул. Гогаля, 6
e-mail: vitoblisp@vitebsk.by
Тэлефон: (+375-212) 42-57-57
Факс: (+375-212) 42-57-81
Віцебскі абласны выканаўчы камітэт
Дзелавое супрацоўніцтва

Андрэй Кунцэвіч: жывыя стасункі з людзьмі з'яўляюцца важным каналам зваротнай сувязі для органаў улады

17.01.2020 Намеснік кіраўніка Адміністрацыі Прэзідэнта Андрэй Кунцэвіч сёння ў час адзінага дня інфармавання сустрэўся з актывам Сенненскага раёна Віцебскай вобласці.

Як адзначыў Андрэй Кунцэвіч, сустрэча ў такім фармаце ўяўляе сабой перш за ўсё адкрыты жывы кантакт з людзьмі, калі яны могуць не толькі пачуць актуальную інфармацыю аб развіцці краіны і свайго рэгіёна з першых вуснаў, але і задаць пытанні, якія цікавяць. "Менавіта такі падыход і з'яўляецца асаблівасцю адзіных дзён інфармавання. Гэта вельмі важны канал зваротнай сувязі для органаў улады як рэспубліканскага, так і мясцовага ўзроўню. Мы ім актыўна карыстаемся", - сказаў ён.

Намеснік кіраўніка Адміністрацыі Прэзідэнта растлумачыў свой выбар месца сустрэчы: "Выбіраючы калектыў, мне перш за ўсё хацелася пагутарыць з прадстаўнікамі сацыяльнай сферы, якая, па сутнасці, і вызначае аблічча невялікага рэгіёна, з'яўляецца апорай мясцовай улады і кіраўнікоў больш высокага ўзроўню".

Андрэй Кунцэвіч таксама адзначыў, што Сенненскі раён трапіў у пералік тэрыторый з напружанай сітуацыяй на рынку працы на 2020 год, у які ўвайшлі 29 рэгіёнаў краіны. У 2019 годзе ў такі пералік былі ўключаны 53 рэгіёны і паводле даных на 1 снежня 2019 года сітуацыя палепшылася ў кожным з іх. "Як мы чулі сёння, негатыўныя тэндэнцыі не маюць крытычны характар, кіраўніцтва раёна бачыць магчымасці для выпраўлення сітуацыі, - дадаў ён. - Галоўнае цяпер - арганізаваць работу на належным узроўні". Намеснік кіраўніка Адміністрацыі Прэзідэнта звярнуў увагу, што ў гэтым напрамку зроблена ўжо нямала, а таксама на станоўчыя зрухі, якія назіраюцца ў раёне. Больш за 20 працэнтаў мясцовага бюджэту фарміруецца прадстаўнікамі прыватнага бізнесу. Гэта перспектыўны напрамак, які нараўне са сферай паслуг, невялікімі вытворчасцямі ў перспектыве можа даць сур'ёзны рост.

Як паведамілі ў Сенненскім райвыканкаме, у 2019 годзе ў раёне былі працаўладкаваны 60 чалавек. У планах на бягучы год - не менш як 70. Перадумовы для гэтага ёсць. Так, у першым паўгоддзі расійскі інвестар на арандаваных плошчах былога цэха па перапрацоўцы малака мае намер запусціць першую чаргу новага прадпрыемства "Еўрабелбізнес" па выпуску цвёрдых сыроў магутнасцю 118 т у месяц. Кошт лініі складае больш за $1 млн. Увесь аб'ём прадукцыі будзе экспартаарыентаваным. Чакаецца, што пробная партыя будзе выпушчана ўжо ў лютым. Рэалізацыя інвестпраекта дала магчымасць стварыць каля 30 рабочых месцаў. У далейшым інвестар мае намер расшыраць вытворчасць, адпаведна павялічыцца і колькасць новых рабочых месцаў.

На Багушэўскім спіртзаводзе (структурнае падраздзяленне Віцебскага лікёра-гарэлачнага завода) у першым паўгоддзі будзе наладжана вытворчасць шклоабмывальнай вадкасці. Абсталяванне пад гэты праект закуплена і ўстаноўлена. Вядуцца пусканаладачныя работы.

Сярод іншых значных для раёна на гэты год інвестпраектаў у райвыканкаме назвалі будаўніцтва ТАА "Санта Рытэйл" у г.Сянно гандлёвага аб'екта, узвядзенне геліяэнергетычнай устаноўкі магутнасцю 1,6 МВт ЗАТ "РЭАГВіцебск", пачатак аказання інжынірынгавых паслуг ТАА "Верыфайд" (прадпрыемства створана на набытых у 2018 годзе невыкарыстоўваемых аб'ектах у Багушэўску, яго паслугі будуць арыентаваны на экспарт).

Усяго за 2019 год у эканоміку Сенненскага раёна было прыцягнута амаль $574 тыс. замежных інвестыцый, у тым ліку $45,5 тыс. на чыстай аснове. Адкрыта восем новых прадпрыемстваў.

У час наведвання раёна Андрэй Кунцэвіч таксама сустрэўся з кіраўнікамі мясцовай прафсаюзнай арганізацыі, азнаёміўся з работай рэдакцыі раённай газеты і шэрага сацыяльных аб'ектаў.

БЕЛТА.


Версия для печати