Цырымонія прыняцця ваеннай прысягі прайшла на плошчы Свабоды. Юнакі, якія папоўнілі рады ваеннаслужачых прыкладна два тыдні таму, прынеслі клятву на вернасць Радзіме, свайму народу і далі абяцанне мужна, самааддана абараняць незалежнасць краіны.
Даваў наказ маладым людзям старшыня Віцебскага аблвыканкама Аляксандр Субоцін. Віншуючы навабранцаў з новым этапам у іх жыцці, ён падкрэсліў, што цырымонія праходзіць у знакавым месцы - каля Вечнага агню, у самым старажытным горадзе краіны Полацку, цэнтры беларускай дзяржаўнасці і славянскай культуры. "Прыняцце прысягі не проста фармальнасць, гэта сімвал сённяшняга дня. Вы становіцеся абаронцамі, вы пакляліся перад сваімі таварышамі, роднымі і ўсёй краінай, што будзеце абараняць яе, захоўваць і ахоўваць, што б ні здарылася", - сказаў кіраўнік паўночнага рэгіёна, пажадаўшы дастойна прайсці перыяд службы.
"Гэты рытуал праходзіць пры баявых сцягах злучэння не проста так - вы прымаеце эстафету мужнасці і славы, герояў і абаронцаў. З прыняццем ваеннай прысягі дзяржава і народ давярае вам сваю сучаснасць і будучыню", - адзначыў камандзір брыгады палкоўнік Аляксандр Аляксеенка.
Сярод больш за восем дзясяткаў маладых людзей, большасць з якіх у хуткім часе папоўняць патрульную роту, - радавы Станіслаў Бармінаў. Ён упэўнены: кожны мужчына павінен азнаёміцца з армейскім побытам і прайсці гэту школу, адказна выконваючы ўсе пастаўленыя камандаваннем задачы. Паводле слоў юнака, яны з баявымі таварышамі прайшлі ўжо добрую падрыхтоўку і гатовы ўступіць у рады ваеннаслужачых 7-й асобнай спецыяльнай міліцэйскай брыгады.
Для бацькоў такія этапы ў жыцці сыноў асабліва хвалюючыя. Наталля Праннік адпраўляе ў армію старэйшага Данілу. Праз некалькі гадоў аддаць доўг Радзіме давядзецца і сярэдняму Кірылу, а бацькі і малодшая сястрычка Вікторыя будуць падтрымліваць іх парадамі на адлегласці. "Перш за ўсё дзеці ў арміі становяцца дарослымі, будуць разумнейшымі і адназначна больш дысцыплінаванымі. Наш сын - хлопец моцны, у яго ўсё атрымаецца, самае галоўнае, каб хлопцы заставаліся мужчынамі і знайшлі сабе ў арміі верных сяброў. Важна, каб сыны памяталі, што мы ганарымся імі, чакаем іх і вельмі любім", - сказала Наталля Праннік.
Свята завяршыла кранальная сустрэча навабранцаў са сваімі роднымі і блізкімі. Маці, бацькі і бабулі пыталіся пра службу, першыя ўражанні, эмацыянальна і клапатліва давалі настаўленні. Не абышлася гэта сустрэча без доўгіх абдымкаў і слёз - за час невялікай разлукі байцам трэба будзе прайсці сур'ёзную армейскую школу.
"БЕЛТА"