Шчыра віншую Вас з прафесійным святам – Днём работнікаў культуры!
У гэты дзень мы шануем рупліцаў на ніве адраджэння нацыянальнай культуры, тых, хто захоўвае нашу спадчыну, стварае духоўныя традыцыі Прыдзвінскага краю, - супрацоўнікаў музеяў, бібліятэк, тэатраў, дамоў культуры, творчыя калектывы.
Развіццё культуры і захаванне нацыянальнай спадчыны з’яўляецца прыярытэтным накірункам дзяржаўнай палітыкі, спрыяе раскрыццю творчага патэнцыялу кожнага чалавека. Штогод у Віцебскай вобласці праходзіць каля 100 тысяч масавых мерапрыемстваў, у тым ліку 9 міжнародных фестываляў і конкурсаў. Сярод іх - Міжнародны фестываль мастацтваў ”Славянскі базар у Віцебску“, Міжнародныя фестывалі сучаснай харэаграфіі і музычны імя І.Салярцінскага, святы традыцыйнай культуры ў Полацку, Паставах, Дуброўне, Браславе. Значны ўклад творчыя калектывы ўнеслі і ў арганізацыю абласнога фестываля працаўнікоў вёскі ”Дажынкі – 2015“, стварыўшы незабыўную святочную атмасферу.
На Віцебшчыне працуе каля 4 тысяч калектываў самадзейнай творчасці. 11 маюць ганаровае званне ”Заслужаны любіцельскі калектыў Рэспублікі Беларусь“. Мы ганарымся дасягненнямі нашых вядомых землякоў і заўжды будзем падтрымліваць тых, хто сваім талентам і майстэрствам робіць важкі ўнёсак у задавальненне духоўных патрэб грамадства.
Віцебскім абласным выканаўчым камітэтам заснавана прэмія за высокія творчыя дасягненні ў галіне культуры і мастацтва. З мэтай падтрымкі найбольш таленавітай моладзі лепшыя навучэнцы дзіцячых мастацкіх школ і каледжаў таксама атрымліваюць прэміі штогадова.
Упэўнены, сваім талентам і самаадданай працай Вы ўмацуеце паўночны рэгіён Беларусі новымі творчымі дасягненнямі.
Жадаю Вам, дарагія сябры, здароўя, шчасця, натхнення, дабрабыту і поспехаў на ніве служэння Радзіме і суайчыннікам.
З павагай,
Мікалай Шарснёў,
старшыня Віцебскага абласнога
выканаўчага камітэта.